tank u

Бидний Түүх

А. Ганбат, үүсгэн байгуулагч.

1993 он

Би нөхрийнхөө энэ гурил зуураад сууж байгаа зурганд хайртай. Анх нарийн боовны бизнесээ эхлээд кг-ийн еэвэн хийж байх үед нөхөр минь бүх зүйлээ өөрөө хийдэг байж. Гүндүүгүй зангаараа зургаа авахуулсан хэрэг. Би ичээд авахуулаагүй санагдаж байна. Уг нь зургаа авахуулсан бол дурсгалтай байх байж. Ингээд бичээд сууж байх юм гэж тэр үед хэн санахав дээ.

Бамбууш компанийхаа вэбсайтыг хийж байгаа юм. Компанийхаа түүхийг бичих гээд хуучин зурагнуудаа үзэн, олон жилийн өмнөх буцалж байсан тэр амьдралд буцаад очих мэт....

Ямар ч ажлыг голохгүй хийх хэрэгтэй шүү гэж залуу үеийнхэндээ хэлмээр..... Аливаа зүтгэл талаар өнгөрдөггүй гэдэг дээ.

Facebook постоос..

Dr Oyuna Chagnaadorj

Үүсгэн байгуулагч.

1993 он. Би дөнгөж Их сургуулийн оюутан болчихсон, нөхөр бид хоёр нарийн боовны цехээ ажиллуулж эхлээд байлаа. Тэр үед дэлгүүрийн лангуу ерөнхийдөө хоосон. Бид эхлээд кг-ийн еэвэн хийдэг байв. Хийхэд амархан, эвдрэл бага гарна, бас тэгээд амттай. Би өөрөө еэвэнд нугасгүй дуртай.

Бид хоёр ааваасаа 50 доллар зээлж бизнесээ эхэлж байсан юм. 50 доллар тэр үедээ гайгүй их мөнгө байсан ч үйлдвэрлэл эрхлэхэд арай л дутна лдаа. Гурил, элсэн чихэр, масло 3-ийг мөнгөндөө тааруулж аваад цех дээрээ ирж хэдэн кг еэвэн хийнгүүтээ түүнийгээ дэлгүүрт аваачиж өгнө. Юм ховор байсан болохоор еэвэн маань маш хурдан борлогдоно. Мөнгөө аваад түүгээрээ дахиад гурил, масло элсэн чихэр авна, түүгээрээ дахиад еэвэнгээ хийнэ.... Энэ просессийг хэдэн зуу, мянга давтсан байх.

Орой гэртээ ирээд би тооцоогоо хийнэ, миний санхүүгийн сургууль төгссөн хэрэг болно доо. Нөгөө 50 доллар нэг эргэлтээр 60 доллар болно, 60 доллар 80 болно...

Энэ мэтээр явсаар 1 сая төгрөг болтол бид мөнгөөрөө хувьдаа юу ч аваагүй юм. 1 сая төгрөг болоход нөхөр маань надад нэг гоё хүрэн хослол авч өгч билээ. Их олон жил өмссөн дөө.

Одоо ч нөхөр маань хэлдэг юм, Миний ханийн тооцоо компани маань хөл дээрээ босоход их хэрэг болсон шүү гэж. Анх бизнэс эрхэлж буй хүмүүсийн хувьд санхүүгийн анхан шатны мэдлэг их хэрэгтэй байдаг.

Бизнесээ байнга л хэмжиж явахгүй бол эрсдэлтэй. Тэр үед би олон хуудастай дэвтэр хэрэглэдэг байлаа. Одоо юм хөгжөөд амар болжээ. Анхан Шатны нягтлангийн хичээл бэлдэхдээ ехсэлийг ашигласан байгаа. Та шууд л миний бэлдсэн sheet-үүд дээр санхүүгээ хөтлөөд явчихна. Та бизнес эхэлж байгаа эсвэл эрхэлдэг ч санхүүгээ яахаа мэдэхгүй байгаа бол дараах хичээлийг авч үзээрэй. Сурахад маш энгийнээр, жишээн дээр үндэслэн бэлтгэсэн байгаа.

Анхан Шатны Нягтлан Бодох

Таньд Амжилт хүсье

1994 он

Нөхөртэйгээ 1-р хороолол дах аавынхаа жижиг өрөөнд, айлын хажууд айл үүсгэчихээд сууж байгаа нь. Шинэхэн авсан өнгөт зурагт, жижиг алтанбулаг хивсээ ханандаа өлгөчихөөд байн байн харан баярлан суух бидэн хоёр. ТВ дээр байгаа цаг нь нөхрийн Ленинградаас авчирсан цаг. Тэрэндээ хайртай гэж жигтэйхэн, байн байн зүлгээстэй....

1995 онд том хүү Ган-эрдэнэ маань төрж, бид 2 анхны байраа худалдан авснаар тусдаа гарч билээ. Намайг төрөхөөс гарахад нөхөр маань аав ээж, дүү нарын хамт байрандаа засвар хийгээд, будаг нь ханхалсан байранд хүлээн авч байсан нь саяхан мэт.

Аав маань анхны зээгээ өхөөрдөн бамбарууш гэж өхөөрдөн дууддаг байсан нь сүүлд Бамбууш болчихсон юм. 1996 онд компаниа Бамбууш гэж нэрлэсэн түүх энэ билээ.

Facebook постоос... Oyuna Chagnaadorj

2007 он

2002 онд бага хүү Бат-эрдэнэ маань төрсөн юм. 2 хүү маань 7 жилийн зайтай төрсөн ч амь нэг гэж жигтэйхэн.

2006 онд нөхөртөө компаниа орхиод МУИС-ийн Нягтлан бодох бүртгэлийн тэнхимд багшилж эхэлсэн бөгөөд тэр цагаас нөхөр маань компанийхаа үйл ажиллагааг хамт олныхоо хамт амжилттай авч явна.

2007 онд дараагийн шинэ байрандаа ороод авахуулсан энэ зургандаа хайртай. 2007 оноос энэ зургаа FB-профайлдаа оруулсан ч солих дургүй. Хөвгүүд маань том болсон ч өөрчлөх тухай бодогдохгүй л байна.

Facebook постоос... Oyuna Chagnaadorj

2013 он

Гэр бүлээ дагуулаад Шинэ Зеландад сурахаар явлаа. Шинэ улс оронд дасан зохицох гэж нэлээдгүй сорилтонд орсон ч гэр бүлээрээ даваад гарсан шүү. Бэрхшээлгүй зүйл гэж юу байхав. Амьдрал ингэж байж амттай болдог юм хойно.

2018 он. Энэ бол онцгой жил. Би Шинэ Зеланд улсын Массей Их сургуульд докторын зэргээ хамгаалсан бол хүү Ган-эрдэнэ маань Окландийн Их сургуулийг програм хангамжийн чиглэлээр амжилттай дүүргэсэн билээ.

Энэ ондоо Oyuna & Erica Ltd компаниа найз Erica-гийн хамт Шинэ Зеланд улсад бүртгүүлэн, онлайн бизнесийн үйл ажиллагаагаа эхлүүлсэн түүхтэй. Мэдээллийг www.oyuna-erica.com

2019 онд хүү Бат-эрдэнэ маань өөрийн бизнесийг эхлүүлсэн бөгөөд мэдээллийг www.wolbataa.com -оос аваарай.

Хүний амьдрал баян билээ. Биднийг юу хүлээж буйг таашгүй. Дахиад урт удаан олон жилүүдийг та бүхэнтэйгээ хамтдаа хөгжиж, олон олон амжилтуудаа цугтаа тэмдэглэх бизээ.

Олон түмэндээ ходоодны талхаар үйлчилдэг байсан бид одоо оюуны талхаар үйлчлэх ажилдаа ханцуй шамлан орсон доо. Бидэнтэй цугтаа байгаарай 😍😍😍.

Бидний амьдралын он жилүүдэд хамтдаа байсан гэр бүл, найз нөхөд, хамт олон, үйлчлүүлэгчиддээ энэ хорвоогийн хамгийн сайхан бүхний хүсье!

Facebook постоос.. Oyuna Chagnaadorj

2021 он

Хань минь хөдөлмөрийн гавьяаны улаан тугийн одонгоор шагнуулжээ. Насаараа бизнесд зүтгэн, өдөр шөнөгүй ажилласан даа, чи минь. Үйлдвэр авч явна гэдэг хэцүү ажил, еэвэнгийн гурил зуурч эхэлснээс хойш бараг 30-аад жил энэ бизнесд зүтгэж. Ханьдаа эрүүл энх, урт удаан наслахыг хүсье! 😍 Facebook post...

Компаний Амжилтууд

Манай хамт олон нь МҮХАҮ Танхимаас зохион байгуулдаг ОУ-ын үзэсгэлэнгүүдэд тогтмол амжилттай оролцдог бөгөөд

- МУ-ын Засгийн Газар, МҮХАҮТ-ын 2008 оны “Шилдэг өрсөлдөгч-50” аж ахуйн нэгжээр ;

- ҮТЕГ-ын 2009 оны “НАЙДВАРТАЙ ТАТВАР ТӨЛӨГЧ”;

- Үлэмжийн чанар батламжит бүтээгдэхүүнээр “Бамбууш” хэвийн боов 2000 оны “Хэрэглэгчдийн найдвартай түнш байгууллага” цом өргөмжлөл;

- “Техник Технологи-2004” ОУ-ын үзэсгэлэнгийн “Дэвшилтэт технологитой байгууллага” цом;

- Хүнсчдийн холбооны 2008 оны “Экологийн цэвэр хүнс үйлдвэрлэгч байгууллага” ;

- “Хүндэт өргөмжлөл” Хан-Уул дүүргийн 2011оны “Шилдэг ажил олгогч” салбарт тэргүүлэн “Шилдэг байгууллага” Хүндэт өргөмжлөл,

- МУ-ын Засгийн Газар, МҮХАҮТ-ын 2011 оны “Топ -150”;

- 2012 оны ТОП-50 Өрсөлдөгч 2013 оны “ТОП-100”, аж ахуйн нэгжээр тус тус ;

- 2013 оны “Ажил олгогч эздийн холбоо”-ны Тэргүүний ажил олгогч шагналаар шагнагдаж;

- 2013 оны “Найдвартай татвар төлөгч” байгууллагаар шалгарсан байна.

“ORANGE BAKERY” брэндийг зах зээлд гаргасан нь маш эрэлттэй бүтээгдэхүүн үйлчилгээ болоод байна.

FRENCH BAGEUTTE, MINI BAGEUTTE, PETITTE PEIN зэрэг 30 нэр төрлийн халуун талх, талхан бүтээгдэхүүн зах зээлд нийлүүлдэг.

Энэхүү бүтээгдэхүүн үйлчилгээ нь “Шарах шүүгээнээс-Шууд хэрэглэгчид” (In store bakery) зарчмаар буюу үйлдвэрт бэлтгэсэн зуурмагийг хөлдүүгээр нь борлуулалтын цэгт хүргэж хэрэглэгчдийн өмнө шарж шууд халуунаар нь борлуулдаг онцлогтой.

“MY FAMILY” брэндээр зах зээлд гаргасан нь хэрэглэгчдийн таашаалд бүрэн нийцэж байгаа билээ.

Мөн Хэрэглэгч хүссэн хэмжээгээрээ худалдан авалт хийж болох Давстай боорцог, Зүсмэл, Савхан, Мушигмал зэрэг 20-нэр төрлийн чанамал бүтээгдэхүүнийг сүлжээ дэлгүүр болон супер маркетуудаар худалдаалж байна.